YAMADA NA KONSEHO INSULAR PA REKONSIDERÁ ORDENANSA KU TA RESTRINGÍ USO DI ALKOHÒL I TABAKO

Kralendijk,- E halamentu aden resién di e konsepto di Ordenansa ku ta Restringí Uso di Alkohòl, Tabako, i Produktonan di Tabako dor di kolegio ehekutivo di Boneiru a kousa sorpresa i preokupashon den seno di e komunidat di Boneiru.

E ordenansa aki, ku tabatin komo meta pa protehá salú públiko, partikularmente esun di hóbennan, di e efektonan dañino di alkohòl i tabako, ya tabata bon avansá den e proseso legislativo.

Ta remarkabel ku kolegio ehekutivo a skoge pa retirá henter e ordenansa. Un ruta alternativo i mas kuidadoso lo tabata pa medio di un amienda, en bes di retirá henter e ordenansa. Es mas, finalmente ta keda na konseho insular pa disidí si ta debolbé e ordenansa na kolegio ehekutivo òf nò.

E konsepto di Ordenansa ku ta restringí e uso di alkohòl, tabako i produktonan di tabako a wòrdu inisiá na yanüari 2025 dor di ex diputado pa Bienestar i Kuido di e tempu ei, ku tabata Nina den Heyer. E empuhe tabata e preokupashon kresiente tokante uso problemátiko di alkohòl i tabako na Boneiru, partikularmente bou di hóbennan.

Sifranan ta mustra ku uso problemátiko di alkohòl na Boneiru ta kasi dos biaha mas haltu ku na Hulanda Oropeo, i ku un proporshon signifikante di hóbennan ta kuminsá bebe i ‘vape’ na un edat yòn. E echo ku e proposishon di ordenansa aki a wòrdu inisiá pa ex diputado den Heyer aparentemente ta un sumpiña den banda di e koalishon aktual.

Segun un deklarashon di diputado Weber, den pasado resien muchu informashon no ta wòrdu kompartí i ta wòrdu retené. Esaki a krea un divishon i a eroshoná konfiansa públiko. Sinembargo, den e lus aki, e deklarashon di diputado Weber ta parse sumamente implausibel. Weber ta presentá su mes komo un kampion den transparensia i ta pretendé di ke sera e distansia entre gobièrnu i komunidat. Pero e promesa aki ta choka ku realidat polítiko.

Transparensia i koperashon ta zona bon, pero e akshonnan di e kolegio ehekutivo pa loke ta trata e ordenansa aki ta mustra riba un kurso den kua poder i kontrol ta parse mas importante ku transparensia.

Esaki ta krea e impreshon ku e palabranan di Weber ta mas un strategia di komunikashon ku un direkshon di maneho kreíbel, i ela wòrdu malamente influensiá dor di e diputado ku sa tur kos mas mihó pero awor tin ménos poder atministrativo.

E desishon pa revoká henter e ordenansa, en bes di hasi ahustenan pa medio di un amienda, tambe ta lanta pregunta riba e parti ku mester ta koutoloso pa ku tipo desishonnan aki. Ademas, no ta kla dikon no a duna konseho insular e oportunidat pa debolbé e ordenansa na kolegio ehekutivo.

E velosidat ku a tuma e desishon i e falta di un splikshon detayá a kondusí na konfushon y desepshon di pueblo, sr. diputado Weber. E ròl di e diputado ku sa tur kos, ku anteriormente a ko-firma e konsepto di e ordenansa i awor a retir’é, tambe ta lanta interogansia.

Meskos ku hopi suidadano na Boneiru, mi ta profundamente preokupá pa revokashon di e ordenansa krusial aki. Pa medio di esaki mi ta hasi un yamada na un òf mas miembro di konseho insular pa utilisá kompletamente nan ròl di supervishon i legislativo i tuma over e konsepto di Ordenansa riba Restrikshon di Alkohòl, Tabako i Produktonan di Tabako.

E konseho tin e opshon pa trata  e ordenansa den su forma original, òf pa reintrodusí esaki komo un proposishon di un òf mas miembro,  si nan ta kere ku e dokumento legislativo aki no mester bai pèrdí.

Ya kaba e ordenansa ta kla i ta duna un base sólido pa atendé e problemanan urgente di salubridat públiko na Boneiru. E ta krusial pa protekshon di nos hubentut i promoshon di un ambiente di bida saludabel.

P’esei e komunikado di prensa aki ta un apelashon urgente na tur miembro di konseho insular pa tuma nan responsabilidat i no posponé mas e paso krusial aki pa salubridat públiko di Boneiru.

Si ta nesesario por invitá eks diputado Den Heyer komo konsehero independiente, di manera ku transparensia, koperashon, apertura, i debido diligensia no ta wòrdu primintí solamente pero realmente implementá na interes di e pueblo boneriano.

FUENTE: DR. WILLEM A. CECILIA