Redakshon
Kralendijk,- Resientemente Konseho Insular a bai di akuerdo pa introdusi apertura di aña Parlamentario pa Konseho Insular di Boneiru.
Frakshon di UPB a tuma nota ku Koalishon a skohe pa duna mas balor na e apertura di e aña Parlamentario ku na e selebrashon protokolar ku tur aña ta wordu selebra dia 6 di September.
Gobierno di Boneiru a disidi ku e aña aki ta tene e parti protokolario di dia di Boneiru riba dia 5 di September 2025 despues di e apertura di e aña Parlamentario ku tambe lo tuma luga dia 5 di September 2025.
Frakshon di UPB ta enfatisa ku UPB su frakshon ta kontra di e desishon di gobierno pa kambia e fecha di selebrashon ofishal di dia di Boneiru pa otro fecha ku no ta dia 6 di September!
E gobierno aktual a para selebrashon dia dia di San Juan i San Pedro e aña aki i awor ta sigui ku kambiamentu di e fecha pa selebra e parti ofishal protokolario di dia 6 di September pa dia 5 di September 2025.
Falta apenas algun siman pa selebrashon di siman di Regatta 2025. Te ku awe no a tende nada di gobierno tokante di selebrashon di dia di Regatta 2025.
Pa Karnaval di 2026 tambe ta reina un silensio total di parti gobierno.
E gobierno aki dia pa dia ta alehando su mes mas i mas for di e pueblo Boneriano trapando riba tur loke ta selebrashonnan kultural i pa korona obra ta kambia fecha ofishal di e parti protokolar di dia di Boneiru.
Frakshon di UPB lo para duru pa gobierno i koalishon no sigui tornu mas na dia ofishal di selebrashon di dia di Boneiru i su dianan ofishal di selebrashonnan kultural.
FUENTE: BENITO DIRKSZ LIDER DI FRAKSHON UPB DEN KONSEHO INSULAR DI BONEIRU
GIPHY App Key not set. Please check settings