FUNDASHON ANTRIOL AVANTI TA SIGUI PREPARÁ SU HABITANTENAN PA SIRBI NAN BARIO I KOMUNIDAT DI BONEIRU MAS MIHÓ.

Kralendijk,- Dia 23 di ougὺstùs 2025, a finalisá e workshop Service Excellence – Turismo na Antriol, kaminda 12 kuristanan a partisipá i a risibí nan sertifikado.

E workshop di 2 dia a keda fasilitá pa Merietza Haakmat, èks Training Manager di Marriott Hotel Curacao i trainer di Wintitude Curacao.

E meta di e workshopnan ta pa partisipantenan ta ekipá pa duna e mihó servisio posibel na momentu ku nan tin un oportunidat pa bende nan produktonan, partikularmente durante e temporada di krusero, pa atraé turistanan pa bini i eksperensiá Turismo na Antriol i sirbi komo un ehèmpel pa otro barionan na Boneiru. 

E workshop a konsistí tambe di konesementu básiko di benta di produkto pa asina krea e konekshon entre nan produkto i e kultura di Boneiru.

E enfoke di e workshopnan tabata habitantenan di bario ku ta traha, entre otro, obra di man, kuminda i bebida krioyo i djus natural, arte di fotografía, maramentu di lensu, arte di pinta, arte plástiko i tur kos ku ta laga e kultura i historia di Boneiru bini dilanti.

Durante e entrega di sertifikadonan por a konta ku presensia di Diputado enkargá ku Ekonomia, Empresariado i Turismo Sostenibel, Anthony Weber i Direktor di Tourism Corporation Bonaire, Elesiër Angel.

Nan a keda hopi impreshoná ku e diferente presentashonnan di e kuristanan, e variashon di produktonan ku por ofresé na bishitantenan di Boneiru i a aplaudí Fundashon Antriol Avanti pa e inisiativa aki.

Fundashon Antriol Avanti a ekstendé un invitashon na ambos autoridat pa nan ta presente na momentu ku tin e promé evento di benta na Plaza Chiku Goeloe na Antriol.

FUENTE: FUNDASHON ANTRIOL AVANTI/LIVE99FM