MIÉNTRAS KU NOS REPRESENTANTENAN DEN KONSEHO INSULAR TA PARA KONTRA OTRO I NO KU OTRO NOS KOMUNIDAT TA SUFRIENDO RIBA DIFERENTE ARIA.

Kralendijk,-  Masha bunita pa splika ku kier traha pa e hòmber chikí, e hòmber humilde pero ku den práktika esaki no ta tuma lugá pa loke ta sigur tareanan ku ta na enkargo di Entidat Públiko di Boneiru. E hòmber chikí ku no por haña un kas pagabel pa biba aden kual ta un derecho fundamental humano.

E hòmber humilde ku no por haña un tereno pa e por konstruí su propio kas i ku debí na preisnan di kas inpagabel no por kumpra ni hür un kas tampoko.

Na unda a keda e transporte públiko di moda ku por a yuda baha e gastunan di e hòmber chikí i humilde. Años ta papia di sentralisá servisionan di gobièrnu pa asina e hòmber chiki  i e hòmber humilde por atendé su asuntunan na un lokèt.

Hopi fondo ta ser bentá afó na hùrmentu di edifisionan di family and friends, miéntras por usa e fondonan ei pa sostené nesesidatnan di e hòmber chikí, e hòmber humilde. E hòmber chikí, e hòmber humilde den nos barionan original Rincon, Nort di Saliña, Antriol, Nikiboko i Tera Corá tin ku para mira kon su bario ta deteroriá pa loke ta su infrastruktura, esta no tin kaminda na drechi ku asera pa por kana ku seguridat, e bario no ta ser mantené limpi, no tin espasio di rekreashon sano pa e hubentut ni tampoko pa esnan ku ta riba edat avansá.

Den un palabra e barionan tradishonal no tin un ambiente bibabel fisiko, miéntras ku e aspekto sosial di e hende tambe no tin e atenshon nesesario. Di e otro un banda barionan nobo ta lanta ku tur fasilidat.  Kunukunan ta disparsé i ta bira arianan di proyektonan grandi di moda ku krio di bestia pa e hòmber chiki i humilde ta bira kasi imposibel.

E piskadónan, un di e provedor importante di nos propio kuminda ademas di ta un aktividat ekonómiko ku bon rendimentu, ehersé pa gran mayoria dor di e hòmber chikí e hòmber humilde no tin e fasilidatnan di infrastruktura i otro fasilidatnan pa e por ehersé su ofishi. Te ainda nos ta wardando riba e haf ku por risibí konteiner di moda ku nos por baha e gastunan di importashon di transporte i yuda den baha kosto di bida.

Lo ta bon pa sinta huntu, revisá e akuerdo di gobernashon E diferensha – Husto i Duradero pa e periodo òktober 2023 te ku mart 2027. Revisá e tres kapitulonan ,pero mas importante e kapitúlo un komunidat husto i mira kuantu punto ta dirigí pa bienestar i alsa kalidat di e hòmber chikí, e hòmber humilde i ser honesto i publiká kuantu a realisá te awor i kuantu ta pensa di realisá den e periodo ku falta te ku mart 2027.

Realisashon no ta den desaroyando maneho, ni den “startnotitie”, pero den ehèmpelnan konkreto i visibel den nos komunidat. Por ehèmpel splika kon a òf ta bai ainda realisá un minimo sosial den maneho ku ta dirigí pa kada habitante sobra minimal 30% den su saku despues di a paga su gastunan básiko.

Kua ta e barionan ku a krea ku ta agradabel , ku mas seguridat i ku ta mas aktivo ku posibilidatnan pa rekreashon sano. Kon a logra viviendanan barata pa kumpra of hür den e barionan eksistente. Kiko konkreto a logra ku re-evaluá i reorganisá e maneho di deporte pa un ehekushon mas efektivo. Tin un maneho stipulá pa sanea debenan struktural pa hendenan ku problemanan di debe i duna oportunidat pa kuminsá di nobo. Tur esakinan i otronan den e akuerdo di gobernashon tabata ku e meta pa alsa kalidat di bida di e hòmber humilde i chikí.

E motivashon prinsipal pa a reorganisá Kolegio Ehekutivo ta pa e puntonan for di e programa aki bira mas visibel pa e komunidat. Sin duda un bon propósito ku lo kompletá sigur e logronan grandi ku nos tur huntu a logra riba e aria sosial den nos komunidat, manera entre otro stipulá minimo sosial, oumentá penshun di behes, di viuda i huèrfano, oumentá sueldo minimo, alsa e plafòn ku no mester paga impuesto, kompensashon pa yu na 225 dòlar pa luna pa kada yu te ku 18 aña, supsidio pa alkohida despues di skol i pa krèsh kompensashon pa internèt, awa i koriente, suspidio di hùr pa FCB i e proyekto piloto di hür den sektor privá, biblioteka nobo, rekonosementu di papiamentu.

Pa logra esaki mester di boluntat polítiko pa surpasá e sombra partidista i personal, tuma i karga responsabilidat i invertí den konfiansa mutuo.

A yega ora pa nos duna komo isla kontesta riba e pregunta kiko nos mes por i pa hasi esaki mihó i unda sosten i apoyo ta nesesario. Huntu den diálogo nos lo por alkansá un nivel mas haltu di provishonnan ku realmente e pueblo, e hòmber chikí i humilde meresé i un desaroyo ekonómiko duradero pa karga esaki.

Union Sindikal Boneriano, representando e klase trahadó  i Business Federation Bonaire, representando e dunadó di trabou a logré ku éksito. Na boso ku pueblo a honra pa representé i goberná pa sirbi hasi esfuerso pa sigui e bon ehèmpel.

FUENTE: NÒCHI WILLEM/LIVE99FM