BONAIRE LIONS CLUB TA YUDA ANIMAL SHELTER BONAIRE KU UN DONASHON.

Kralendijk,- Bonaire Lions Club ta orguyoso pa informa ku a yuda Animal Shelter Bonaire (ASB) ku un donashon di un suma efektivo, entregá durante e Market na Animal Shelter Bonaire.

E evento, a tuma lugá na Animal shelter na Kaminda Lagoen 26. E luga tabata bon bishita i tabata tin e posibilidat pa kumpra produktonan trahá na man, kuminda i bebida, tambe tabata tin aktividatnan pa mucha i hopi kos mas — tur ku un meta: kolektá fondo pa kuido i bienestar di e bestianan ku ASB ta atende.

“Ku e kontribushon aki, Bonaire Lions Club ta reafirmá su kompromiso pa sirbi nos komunidat kaminda mester,” segun Presidente di Bonaire Lions Club,Riency Holder a bisa. “Animal Shelter Bonaire tin un rol fundamental den protehá i kuida animalnan riba nos isla, i nos ta orguyoso di a yuda den nan mishon.”

E donashon aki ta reflehá e lema di Lions Club International: “We Serve”, i ta mustra e sosten i apoyo di nos klup na proyektonan di servisio komunitario ku ta yuda mehorá kalidat di bida tanto pa hende komo pa animalnan na Boneiru.

FUENTE: BONAIRE LIONS CLUB/LIVE99FM