CLARK SU STORIA TA DEBIL I SU LIDERASGO POLITIKO A DEBILITA

Kralendijk,- Despues ku dos diputado a tuma retiro di Kolegio Ehekutivo, tin un krisis di Gobernashon na Boneiru.

Clark Abraham su koalishon di sinku (5) asiento a duna di konose ku e koalishon no kier traha mas ku Diputado Nina i Diputado Angelica.

Pa e motibu ei e dos diputadonan aki a tuma retiro. Despues di e retiro di e dos diputadonan a bin sali na kla ku ta Clark Abraham i Daisy Coffie no kier a traha mas ku e dos diputadonan. Di partido Democrat nos sa ku ningun di nan tres miembronan di Konseho Insular lo no papia nada kontra di Clark pasobra nan tin miedu. Pues nos tabata sinta warda deklarashon di Clark Abraham pa nos haña klaridat.

Awor ku Clark Abraham a sali duna deklarashon, a sali na kla ku Clark su posishon politiko a debilita konsiderabelmente. Por a nota un deklarashon basta suak di Clark. Fuera di un kantidat di deklarashonnan ku no tabata basa riba berdat, pues mentira, Clark a benta falta di e mal gobernashon di e ultimo añanan riba e dos diputadonan saliente.

Esaki ta un forma bastante kobarde pa dil ku realidat di e mal gobernashon ku nos ta eksperenshando. Tur hende sa ku ta diputado Abraham t’esun ku ta stroba gobernashon. Tambe t’asina ku gobernashon ta kolegial pues si gobernashon ta malu, no por ta falta di e dos diputadonan saliente. Nos tur sa tambe ku ta Clark ta diputado di finansas.

Clark den su deklarashon a demostra ku e no ta komprende net net nada di gobernashon finansiero. Pasobra ta juist pasobra ta sobra asina tantu sen na fin di aña, esaki ta nifika ku Clark no ta fasilita su otro diputadonan ku sufisiente fondo pa nan por goberna.

Clark no ta kompronde kon pa e pone e sen na disposishon di e diputadonan pa nan por Goberna. Ta pesei ta sobra asina tantu sen na fin di aña.

Finalmente lokual si a soprendo nos, despues di a skucha Clark su deklarason, ta ku e Clark aki ta zona politikamente hopi suak. Ta bisto ku Clark su posishon politiko a debilita drastikamente i ku Clark a hañ’e ta kita e dos diputadonan pa komplase ku podernan ku nos no sa ta kiko ni ta kua. Punto ta ku e Clark ku nos a tende na den deklarashon, ta un Clark politikamente hopi suak.

Nos lo sigui vigila e situashon di aserka. Pasobra atrobe tin algu nobo den politika di Boneiru, tin un krisis di gobernashon pero tur kos ta bon bon segun Clark Abraham.

FUENTE:JAMES KROON MIEMBRO DI KONSEHO INSULAR PA UPB