Redakshon
Kralendijk,- Pa loke ta e kapitulo di bon dunadó di trabou en general nos ta papia ku e dunadó di trabou mester komporté bon den su relashon ku e trahadó.
E mester ta kouteloso den toma di desishon, e mester duna e trahadó konfiansa ku e trahadó por yega serka dje i papia liber, e no mester hasi maluso di su poder. E mester trata su trahadónan igual. E ta motivá su desishonnan i hopi importante e ta duna su trahadónan partisipashon den e kompania.
E forma mas adekuá pa duna e partisipashon aki ta dor di ta para positivo i hasta stimulá su trahadónan pa drenta un sindikato. Ku un aktitut positivo asina e dunadó di trabou ta logra algun meta hopi importante pa su kompania ta un éksito.
E ta krea un ambiente di trabou agradabel, kaminda e trahadó ta bai ku smak bai traha, algu ku ta reflehá su mes tantu den e relashon entre e trahadónan riba flur di trabou, pero tambe e ta reflehá serka e klientenan ku ta bishitá e negoshi. E trahadó ta sinti su mes parti di e negoshi i ta hisa su produktividat ku na su turno ta na benefisiso di e kompania. Un produktividat haltu ta kondusí ku e sindikato huntu ku e dunadó di trabou por negoshá kondishonnan primario i sekundario positivo. Bon salario, bon areglo di fakansi, bon penshun, bon maneho den kaso di malesa, ets. ets. Awor ku nos sa kiko ta e elementonan pa ta un bon dunadó di trabou, ta mes importante pa e trahadó sa kiko ta enserá un bon trahadó.
Un bon trahadó ta kumpli ku su orario di trabou i sigur no ta yega su trabou lat strukturalmente. Un trahadó mester karga su responsabilidat i mester hasi loke ta pidi di dje tanten ku esaki ta rasonabel. E trahadó ta respetá e reglanan di e kompania i opviamente e trahadó ta duna lo máksimo na kalidat di su trabou. Semper den bo komportashon ku bo kolega, ku bo superior i/o ku kliente komportabo profeshonal i motivá. Un bon trahadó ta aserká e kliente ku un sonrisa, e no ta para warda e kliente yega serka dje. E refleho ei lo benefisiabo mas ku bo ta kere.
Bo ta krea un oura positivo rondó di bo persona ku tantu paden komo pafó di bo trabou ta papia positivo di bo. Esaki sin duda lo benefisiabo den bo ambishon pa krese komo persona den bo bida. Un punto sumamente positivo ta ku si bo sa kon traha huntu, koperá, duna un man sostené otro.
Si tur dia bo lanta bai trabou ku e aktitut aki i ku e mentalidat positivo aki bo a demonstrá ku bo ta responsabel pa bo trabou, bo organisashon i pa bo mes i sigur pa esnan ku ta dependé dibo. Ku un aktitut asina trabou ta un alegria, trabou ta un fuente di distraishon, un fuente pa bo amplia bo konosementu i bo bida sosial.
Trabou lo enrikesé bo eksperensha di bida. I mas ku tur kos trabou lo ta un plaser, un felisidat i no un kastigu. Gana bo pan di kada dia ku sodó di bo frente sea físiko, sea mental o sea komo un independiente mester hasibo orguyoso, mester lanta bo outoestima i lo bo mira i eksperenshá kon hende lo dunabo e rèspèt ku bo meresé.
Lo bo haña e rekonosementu ku ta tokabo i no por ta otro ku lo bo ser rekompensá komo un bon trahadó. No ta por nada ku sindikalismo su prinsipionan ku e ta usa komo defensa di interes di e klase trahadó ta e tres R-nan, esta Rèspèt, Rekonosementu i Rekompensa hustu. Ta riba nan nos tin e forsa di negoshá un bon CAO ku tur espasio pa sigui mehorá esaki kada biaha ku nos bai mesa. I ta abo, trahadó komo bon trahadó ta krea e forsa ei ku ta kondusí ku e dunadó di trabou tambe ta bai di akuerdo, pasobra simplemente bo meresé.
FUENTE: NÒCHI WILLEM/LIVE99FM
GIPHY App Key not set. Please check settings