Kralendijk, – Awe, Korte a dikta sentensia tokante di desishonnan di enforsamentu imponé pa Kolegio Ehekutivo na 9 doño di kasnan den e bario Sabal Palm. Segun Kolegio Ehekutivo, e doñonan aki ta violá e Plan di Desaroyo Espasial Boneiru dor ku nan ta hür nan kas na turista pa periodonan di ménos ku tres luna.
Enbirtut di e Plan di Desaroyo Espasial Boneiru (Ruimtelijk Ontwikkelingsplan Bonaire – ROB), e terenonan den kua e kasnan di e 9 doño ta ubiká, ta destiná pa uso residensial. Esaki ta un provishon legal ku tur hende mester kumpli kun’é. En prinsipio, pues, no ta permití hürmentu di e kasnan na turista pa término kòrtiku.
Algun doño a solisitá un eksonerashon di e prohibishon aki. Kolegio Ehekutivo a rechasá e solisitutnan aki. Awe, Korte tambe a dikta sentensia tokante di e rechaso di e solisitutnan aki.
Lei di transishon ta ofresé un solushon pa e doñonan?
Algun doño ta argumentá ku nan mag hür nan kas na turista, pasobra e ROB ta kontené un provishon ku kasnan ku na 2010 – na momentu ku e ROB a drenta na vigor – tabata wòrdu usá pa estansia rekreativo por sigui wòrdu usá pa e propósito aki. Korte no ta bai di akuerdo ku e doñonan riba e punto aki. E doñonan ta invoká un provishon di transishon den ROB, i p’esei nan mester hasi plausibel ku na 2010 nan kasnan tambe tabata wòrdu usá pa estansia rekreativo. Nan no a logra hasi esei.
Kolegio Ehekutivo a violá e prinsipio di konfiansa?
Kolegio Ehekutivo no a lanta ekspektativanan serka e doñonan di e kasnan – ku legalmente mester honra – ku lo no enforsá. E echo ku Kolegio Ehekutivo pa basta tempu no a aktuá kontra e hürmentu pa término kòrtiku na turista no ta sufisiente argumento. Un di e doñonan tambe a referí na un mensahe di koreo elektróniko di un trahadó di OLB. Korte ta haña ku e teksto di e mensahe aki ta muchu general i insufisientemente konkreto. Ademas, e doño mes mester a hasi preguntanan ku motibu di e mensahe aki. A base di e mensahe aki, pues, e doño no por a suponé ku Kolegio Ehekutivo lo no tuma akshon di enforsamentu. E doñonan tambe ta argumentá ku nan a haña informashon robes di doñonan anterior, bisiñanan, makelarnan i notarionan tokante di e (im)posibilidat di hürmentu di nan kasnan na turista pa término kòrtiku. Asta si esei ta korekto, no ta nifiká ku Kolegio Ehekutivo no mag aktuá kontra violashon di regulashonnan legal.
Kolegio Ehekutivo a aktuá kontrali na e prinsipio di igualdat?
Kolegio Ehekutivo a splika ku e lo tuma akshon di enforsamentu den otro barionan tambe. Debí na e kantidat haltu di kehonan den e bario Sabal Palm, Kolegio Ehekutivo a kuminsá einan. Kolegio Ehekutivo mag priorisá enforsamentu. Korte no tin motibu pa duda e splikashon di Kolegio Ehekutivo i ta suponé ku enberdat Kolegio Ehekutivo lo tuma akshonnan di enforsamentu kontra hürmentu pa término kòrtiku di kasnan na turista den otro barionan kaminda a base di e ROB no ta permití esaki.
Pues Kolegio Ehekutivo tabata tin mag di enforsá?
Ora ta violá un regulashon legal, en prinsipio Kolegio Eheutivo mester tuma akshon di enforsamentu kontra di esaki. Den e kaso aki, ta violá e regulashon legal ku mester usa e kasnan di e doñonan pa propósitonan residensial, pasobra esakinan no ta inkluí hürmentu pa estansia rekreativo. No a keda demostrá ku tin sirkunstansianan spesífiko ku ta pone ku Kolegio Ehekutivo no mag tuma akshon di enforsamentu.
Hürmentu na dòkternan ku ta traha na hospital ta hürmentu pa estansia rekreativo?
Un di e doñonan ta hür su kas na su koleganan, dòkternan di Hulanda ku ta traha den hospital di Boneiru pa un periodo kòrtiku. Esaki no ta hürmentu pa estansia rekreativo. Esaki ta nifiká ku den e kaso di e doño aki, Kolegio Ehekutivo no tabata tin mag di tuma akshon di enforsamentu, pasobra ademas a keda demostrá sufisientemente ku den e kaso di e doño aki, no tin peliger di repetishon di hürmentu pa estansia rekreativo.
E echo ku Kolegio Ehekutivo a rechasá e solisitutnan di eksonerashon tabata korekto?
Tabata korekto ku Kolegio Ehekutivo a rechasá e solisitutnan di eksonerashon di e prohibishon di hür e kasnan pa un periodo di ménos ku tres luna na turista. E uso mas efektivo di e terenonan di e doñonan ta e uso di akuerdo ku e ROB, i esaki ta uso residensial. No tin motibu pa limitá e uso aki ku segun lei ta e uso mas efektivo.
Zie www.rechtspraak.nl bij ECLI:NL:OGEABES:2024:110 en ECLI:NL:OGEABES:2024:111
FUENTE:KORTE DI HUSTISIA/LIVE99FM

GIPHY App Key not set. Please check settings