PASTECHI DI BIENTU: UN EHÈMPEL DI KRIMPFLATIE NA BONEIRU.

Kralendijk,-  Fundashon Tienda pa Konsumidó Boneriano (FTPKB) a nota  un keho interesante tokante kalidat di pastechi ku a ser publiká riba Facebook.

FTPKB a tuma kontakto ku e konsumidó pa tende su eksperensia. Segun e konsumidó, su pastechi faborito a laga di deseá kompará ku loke ta kustumber

E situashon aki i ta un ehèmpel klave di krimpflatie, un táktika ku negoshantenan ta usa pa baha gastu i mantené nan ganashi sin ku konsumidó ta ripará. Pero den e kaso aki, e situashon tabata hopi riparabel.

Segun e konsumidó, e pastechi tabata kosta $2.50 i ta parse mané yená ku bientu. Ora dal un hap den dje, e la sinti un bientu sali for su boka e pastechi tabata kasimente bashí, ku ni sikiera e smak di e ingrediente tabata presente. Kaminda ántes bo tabata haña un pastechi yená ku karni, keshi òf tuna, awor e pastechi ta bashí ku kontenido skars i mansa so.

Esaki ta un ehèmpel di krimpflatie den industria di kuminda, kaminda negoshantenan ta baha kantidat òf kalidat di nan produkto pa redusí gastu, pero e konsumidó ta keda defroudá ku un produkto ku no ta di e mesun kalidat òf kantidat kustumbrá, miéntras ku e si  ta sigui paga e mesun, òf asta un preis mas haltu pa algu ku ta ménos.

Kon bo por evitá kumpra un pastechi di bientu?

FTPKB ta rekomendá e siguiente pasonan pa konsumidónan ku ke evitá situashonnan manera esaki:

1. Kompará e pastechi: Wak check e tamaño, peso i kontenido si e ta parse diferente ku ántes. Si bo a ripará un kambio, no duda pa hasi pregunta n’e bendedó.
2. Puntra na bendedó: Si bo tin duda, puntra kiko ta den e pastechi i kon e ta prepará. Transparensia ta importante si nan no por duna un kontesta klave lag’e para.
3. Skohe konsientemente: Preferí skohe un bendedó ku ta konosí pa su kalidat i ku ta transparente tokante su produkto.
4. Reklamá: Si bo risibí un pastechi ku ta bashí ku un mansa eksageradamente diki, saka un potrèt pa generá prueba  i hib’e bek. No laga nan engañá bo ku un pastechi di bientu! Eksigí bo sèn bek i no kumpra pastechi einan mas, no sigui sostené un situashon inhustu. E rebendedó ta keda forsa pa reklamá e bendedó/trahadó di pastechi òf lo buska un otro opshon ku ta kuadra ku e loke e konsumidó lo kumpra sin keha.
5. Registrá bo keho: registrá bo keho riba wèpsait di  FTPKB  https://tiendapakonsumido.com. Divulgashon di práktikanan deshonesto di benta ta empoderá e konsumidó. Ora informashon tokante práktikanan inhustu, ta disponibel públikamente esaki ta krea konsumidónan konsiente huntu ta haña un posishon di poder. Transparensia ta fundamental pa kontrarestá e tipo di práktikanan aki. Konsumidónan konsiente  tin e poder pa influensiá e merkado i forsa negoshantenan pa operá ku mas transparensia i honestidat.
6. Sea alerta: Krimpflatie ta un reto pa konsumidó, pero ku atenshon i informashon, bo por hasi mihó eskohonan i evitá situashonnan ku bo ta paga di mas pa ménos.

Pa informashon mas amplio

Krimpflatie ta un táktika ku ta sosodé hopi suptilmente, pero ku e konsumidó ta sinti e efekto di dje. FTPKB ta rekomendá pa tur konsumidó ta alèrt i hasi eskohonan konsiente ora nan ta kumpra .

Si bo ke sa informashon amplio di forma nan di krimpflatie i kon i na ki momentu bo por atendé ku esaki, bishitá nos wèpsait na https://tiendapakonsumido.com. Aki bo por lesa un artíkulo kompleto ku hopi informashon útil pa yuda bo ta un konsumidó mas konsiente  i alerta.

FUENTE: FTPKB/LIVE99FM