SINT-MAARTEN: CFT: “OUMENTO DI INGRESONAN TA NESESARIO”

Philipsburg – Sint Maarten mester priorisá oumento di e ingresonan. Kolegio di supervishon finansiero Kòrsou i Sint Maarten (Cft) a insistí riba esei den kòmbersashonnan ku resientemente a hiba ku Gobièrnu di Sint Maarten.

Sin reformanan, den e añanan benidero, e pais lo no tin sufisiente rekurso pa gastunan públiko i invershonnan importante.

Cft tin bastante tempu ta ekspresá su preokupashonnan tokante di e echo ku e ingresonan di Sint Maarten no ta alkansá e nivel antisipá. E karga fiskal kolektivo ta 27 porshento, loke kompará ku Aruba, Kòrsou i Hulanda – kaminda tin karga fiskal promedio di 40 porshento – ta abou.

E sistema di impuesto di Sint Maarten ta antikuá i e Servisio di Impuesto tin problema di implementashon. Debí na esaki, e pais ta pèrdè ingresonan supstansial. Banda di esaki, Fondo Monetario Internashonal ta antisipá défisitnan serka Uitvoeringsorgaan Sociale en Ziektekosten Verzekeringen (SZV) na 2027 den kaso ku no ta modifiká maneho. Sin reformanan, Cft ta antisipá défisitnan struktural riba e presupuesto di Sint Maarten.

Reformanan

Resientemente a inisiá un trayekto di reforma pa Servisio di Impuesto. Esaki ta un paso den bon direkshon. Den e konteksto aki, ta importante pa Servisio di Impuesto traha di manera mas integral pa loke ta trata implementashon. Banda di esei, tin mas opshon pa Sint Maarten oumentá e ingresonan, manera e introdukshon di un impuesto riba turismo, enfoke riba e kobro di e impuesto riba alohamentu i e introdukshon di un seguro médiko general. E echo ku un instansia so ta kobra impuesto i prima ta kondusí na un kobro mas efisiente i mas ingreso. Servisio di Impuesto por hasi mas kòntròl pa medio di kolaborashon ku Audit Team Sint Maarten. Cft ta urgi pa implementá e plannan aki mas pronto posibel pa asina generá mas ingresonan i realisá surplusnan riba e presupuesto. Di e manera aki, Sint Maarten por mehorá e posishon di likides i hasi gastunan públiko i invershonnan importante.

Presupuesto pa 2025 i 2026

Apesar ku a entregá e proyekto presupuestario pa 2025 na tempu, Sint Maarten atrobe no a logra pa konkluí e proseso presupuestario promé ku kuminsamentu di aña. Pa e periodo 2025–2028, e pais ta antisipá surplusnan. Den e marko aki ta suponé ku na 2026 lo introdusí un impuesto riba turismo. E medida aki lo kondusí na ingresonan adishonal, sinembargo, ainda no a konkluí e trayekto legislativo. P’esei, Cft ta konsiderá ku e surplusnan antisipá no ta sigur. E défisitnan persistente serka e fondonan di kuido tambe ta un riesgo pa e presupuesto nashonal.

Aktualmente, Sint Maarten ta trahando riba e presupuesto pa 2026. Cft ta urgi e pais pa hasi tur esfuerso pa stipulá e presupuesto promé ku aña nobo ta kuminsá, pa promé biaha for di 2010. Di e manera aki, e pais por duna un paso importante den e mehorashon di finansas gubernamental.

FUENTE: CFT/LIVE99FM